【明報專訊】近日因為仗義上載港大校委會錄音，再次被網民捧為「義氣仔女」嘅成人影片網站ThisAV又有新搞作，事緣獲《金融時報》報道，盛傳係令Bitcoin價格炒升1倍，轉頭又急插兩成嘅內地金融交易平台MMM，竟然喺ThisAV賣廣告，唔知有幾多男士因此中伏？
一般人瀏覽「鹹網」時，睇怕都唔會有閒情留意啲廣告，但原來呢間公司大有來頭。根據報道，MMM喺1989年由俄羅斯人Mavrodi設立，同時建立一個「金字塔」制度，即係類似層壓式推銷，結果最後畀人拘捕。而傳奇嘅係，呢位仁兄出監後3星期，竟然獲選入俄羅斯國會。
有同事話，唔怪得啲鹹網從來都唔上市，原來佢哋廣告咁高流量，有排佢哋搵，而小琴當初以為ThisAV只係做香港生意，原來唔少內地同胞都偷偷地上ThisAV，難怪ThisAV成日發布政治消息啦！
