明報APP
報章內容
巨無霸指數反映美金估值過高
標籤：小琴密語
【明報專訊】美國總統特朗普之前話美元升得太急，價值過高，美元即刻腳仔軟。不過，軟極相對其他貨幣都仲係「估值過高」，皆因喺美國，買個巨無霸要成40蚊港紙（見表）！《經濟學人》早排就公布咗用嚟評核世界主要地區貨幣匯價係咪處於「正常」水平嘅「巨無霸指數（Big Mac Index）」。如果貨幣匯價「正常」的話，每個地區嘅貨幣購買力應該係一樣嘅，即係一件貨，邊度賣都好，都應該係同等價錢。
指數以Ｍ記巨無霸做指標，並且用美元做基準，假設唔同地區嘅貨幣匯率「正常」的話，巨無霸指數就應該等於「零」。喺美國買一個巨無霸盛惠5.06美金，即39.25蚊港紙；48個地區（計埋歐元區）之中，有42個地區嘅巨無霸都平過美國（見表）。最抵就係埃及嘅巨無霸，只係賣11蚊港紙，巨無霸指數係71，即係比美國平超過七成！
雖然美金係貴，但美國嘅Big Mac都未算最貴，最貴嘅Big Mac來自瑞士，每個賣6.35美金，即49.25蚊港紙！至於成日被人鬧加價嘅香港，Big Mac指數係51，即係平過美國逾五成，每個賣緊近20蚊左右。那些年香港嘅Big Mac套餐，有埋薯條汽水都只係20蚊咋；𠵱家都係廿蚊，但不過就只買到個包。
email: piano@mingpao.com