【明報專訊】萬眾期待嘅GU尖沙嘴分店噚日率先開放畀傳媒預先參觀，未到預定開始時間，已經有大批記者喺門外等候。呢間分店上層就係UNIQLO，雖然GU係賣時尚，UNIQLO就賣basic嘢多，但有部分產品其實都幾相似。小琴就兩邊格過價，發現GU產品普遍都較UNIQLO平約30%，最誇張就係女士們做運動時最鍾意着嘅sports bra，GU可以賣平近一半，售價只需79蚊，咁當然質地係有啲分別啦，不過平平地都幾抵着！
話晒母企迅銷（6288）第一次將GU帶嚟香港，梗係會有「開幕大酬賓」啦！部分貨品較原價平15%至20%，例如男裝恤衫原價179蚊，𠵱家開張價149蚊，平成30蚊㗎，優惠期至4月6日；GU亦都帶咗日本福袋潮流過嚟，開幕第一日顧客可以99蚊搶購總值超過270蚊嘅福袋。
迅銷常務執行董事柚木治話，希望3年後海外市場，即台灣、上海、香港嘅GU店可以開到50間，預計將佔GU 10%或以上嘅營業額，之後就會計劃拓展如韓國等其他亞洲地區。
email: piano@mingpao.com
