明報APP
報章內容
匯豐種米耕田 拎聯合國文化遺產保護獎
【明報專訊】匯豐咁大間金融機構，拎大大小小唔同商業獎、金融獎之類一啲都唔奇怪，但如果話匯豐拎到聯合國嘅文化遺產保護獎，個得獎原因仲要係耕田種米，咁就真係令人意外。匯豐今次拎到嘅係由聯合國教科文組織（UNESCO）頒發，今年首設嘅「亞太區文化遺產保護獎——可持續發展特別貢獻獎」，呢個獎係為了表揚優秀保育項目對永續發展作出重大貢獻。匯豐嘅得獎項目，就係2013年同港大公民社會與治理研究中心，以及荔枝窩村一齊推出嘅「匯豐永續鄉郊計劃」。
茘枝窩位於新界東北，靠近沙頭角半島船灣郊野公園，當地有6公頃良田可以耕種包括水稻、鬱金香、紅蘿蔔等多達10幾種農作物。永續鄉郊計劃就透過農業、教育及科研結合，推行可持續發展措施及創新項目。而教科文組織就讚揚計劃唔單止保留客家文化，亦為香港推動城鄉互動可持續發展奠下基礎。
email:piano@mingpao.com