明報APP
報章內容
國泰寄艙行李重量上限擬「肥上瘦下」
【明報專訊】財困未解的國泰（0293）又有搵錢新招，據《南早》報道，國泰正計劃削減經濟艙最便宜機位寄艙行李重量上限，由原本嘅30公斤降至23公斤，而其他艙型機位嘅行李重量上限就獲顯著上調。今次嘅舉措好難唔令小琴聯想到，國泰莫非想博乘客行李寄倉增加收入？
現時經濟艙、特選經濟客艙、商務艙及頭等艙行李重量上限分別係30、35、40同50公斤。經濟艙再可以細分三種服務，即save、core同flex。新安排下，國泰將經濟艙服務重新定位為light、essential同flex。light嘅行李重量由上限30公斤將降至23公斤，essential同flex旅客則可攜帶兩個各重23公斤嘅行李，總重量可達46公斤。
而特選經濟客艙行李重量上限將增加近三分之一，由原本嘅35公斤增至46公斤；商務艙及頭等艙行李重量上限，則分別由40和50公斤升至64公斤，增幅分別達60%及28%。國泰雖然未說明上述嘅改動將會係幾時生效，但將影響全球絕大部分航線，新西蘭及美洲除外，因後兩者採用不同行李重量制度。