明報APP
報章內容
蕭世和辭任 星島節省逾百萬人工
【明報專訊】內房佳兆業（1638）年初入主星島（1105），正所謂一朝天子一朝臣，繼一眾高層6月初辭任後，何柱國年代留下最後一名高層蕭世和（圖）亦都係時候講「拜拜」；新老闆郭英成愛女郭曉亭同極速上位嘅原首席運營官、現年34歲嘅蔡晉就將會出任聯席行政總裁，調動將於10月2日生效。
蕭世和1999年加入星島，可以稱得上係公司老臣子，2013年開始出任公司行政總裁，佢似乎深得何柱國寵愛，雖然話期間星島業績唔係話好突出，但年薪高峰期超過900萬，就算期間公司間中都有裁員減薪，去年年薪依然接近470萬元。相比起嚟，兩位新任聯席CEO年薪加埋都係約310萬，慳返成百萬都可以加唔少記者人工。小琴諗返起，郭英成作為星島新老闆6月底首次見傳媒，當時都仲有提到，希望蕭生可以帶到啲經驗畀公司，如今睇嚟應該已經傳授完畢？