黑雨繼續開市 歐冠昇「得償所願」

文章日期:2021年10月9日

【明報專訊】噚日黑雨之下奇景頻現,銀行、商場化身「水舞間」,巴士勇闖激流險象橫生,打工仔返工真係要「過五關斬六將」,十足玩緊「魷魚遊戲」。不過另一邊廂,港股好似「平行時空」咁繼續交易,全因黑雨警告喺開市之後先發出,所以交易不受影響。早前港交所(0388)新任行政總裁歐冠昇提過,唔明白點解黑雨要停市,又話考慮搵方法喺黑雨下繼續開市,睇嚟今次真係畀佢「得償所願」喇。

港交所噚日話,由於黑雨警告發出嗰陣,港股已經進行緊交易,所以會繼續交易直至收市。而咁啱得咁橋,歐冠昇喺今年7月中提過,愈來愈多打工仔習慣在家工作,加上全球金融業受疫情影響而轉向遙距工作,某程度反映港交所一啲規定過時。佢又話,並唔係想將任何人置於危險之中,不過就覺得要確保當投資者有交易需要時,市場會保持開放。

financepage@mingpao.com

[小琴密語]