馬雲被爆荷蘭考察農業科技

文章日期:2021年10月28日

【明報專訊】阿里巴巴(9988)捲入政府監管風暴之後,創辦人馬雲嘅動向備受市場關注。盛傳被「禁止出境」嘅馬雲,就畀自己有份投資嘅《南華早報》爆出最新行蹤,話馬雲以個人身分去咗荷蘭考察農業科技,包括當地一家以鋁材建造溫室屋棚嘅公司BOAL,馬雲仲好愜意咁捧起一盆蘭花,問吓隔離專家意見。

據報,馬雲將會參觀歐洲更多涉及農業基礎設施、植物育種同專業知識培訓嘅公司同埋研究機構,相信農業科技可以同阿里技術相結合,為中國農業現代化創造出「巨大潛力」。不過阿里發言人就拒絕置評,因為馬雲已經唔再參與集團日常營運。

今個月初,有傳馬雲現身香港;隨後又傳佢搭飛機去西班牙,同老友一齊搭乘價值16億元嘅超級遊艇出海度假。唔知佢下次會去邊呢?可唔可以帶埋小琴去!

[小琴密語]