擬改名「懶豬」 GEM股即飈四成

文章日期:2021年10月29日

【明報專訊】GEM(前稱創業板)上市嘅匯安智能(8379)前日搞搞新意思,改名叫做「懶豬科技」,諗住一洗頹氣、改下企業形象咁話喎。點知又真係開口中,噚日離奇炒上,一度飈升44.4%,高見0.13元,收報0.118元,升超過三成,真係「懶豬」都變「飛天豬」。

雖然「懶豬」識飛天,不過成交額就唔多,得132萬元。集團就話,需要開股東特別大會處理改名嘅特別決議案。睇返業績先,截至今年6月底止首季,集團虧損擴大到199.4萬元,上年同期就蝕36.3萬元,蝕幅按年擴大成4.5倍!

而用奇招引人入勝嘅仲有信陽毛尖(0362),今年2月改個「國龍茅台」就爆升逾倍,而佢以前叫過「東君化工」、「中國天化工」,唔通改名真係可以轉運?

[小琴密語]