生產力局響應港府 出入須掃安心出行

文章日期:2021年11月3日

【明報專訊】本月開始市民進入政府大樓,一定要用「安心出行」,屬公營機構嘅生產力促進局原本不在此列,但噚日亦宣布響應政策,下星期一(8日)起,所有人進入九龍塘生產力大樓都要用「安心出行」,話要全力配合政府防疫政策,保障市民健康,並且為之後恢復同中國通關或者跨境出行做好準備。

司法機構、醫管局、食環署、康文署,各個政府部門排住隊公布「安心出行」具體安排,正所謂「執輸行頭慘過敗家」,今次生產力局拿拿臨接力,要求全面使用「安心出行」進入九龍塘生產力大樓,包括所有員工、合約承辦商人員、學員、訪客同公眾人士。

生產力局總裁畢堅文就話,會積極配合政府政策,期望今次做法可以協助打穩防疫嘅防線,並且達到早日同各地逐步恢復正常通關嘅目標,幫香港經濟再打下一支強心針。睇嚟愈來愈多公營機構會響應政府號召,唔知幾耐就會輪到私營機構配合政府呢?

email:piano@mingpao.com

[小琴密語]