摩通港僱員探親隔離費 最高可報銷3.9萬

文章日期:2021年11月23日

【明報專訊】港府為咗同內地通關堅持「清零」,外資點呻都不為所動,噚日摩通就出招留住人才,宣布向香港員工提供最高5000美元(3.9萬港元)嘅探親隔離費用報銷,所規定嘅直系親屬包括配偶、同居伴侶、子女、父母同祖父母,計劃由今年12月起至明年11月底。

外媒引述摩根大通內部備忘錄顯示,包括執行董事及該級別以下人員嘅所有駐港員工,都可以申請單次隔離檢疫費用報銷。摩通香港區總裁Harshika Patel話,銀行意識到港府所採取嚴格嘅隔離措施,影響到好多員工探望海外親人。外資一直要求港府放寬隔離規定,早前有調查發現,幾乎四分之三國際公司喺吸引同留住人才方面都遇到困難。花旗、高盛在內嘅全球主要銀行都為員工提供唔同幫助,例如額外假期,今次連現金都出埋,睇嚟人才流失問題真係不容忽視。

[小琴密語]