傳有線四人幫遭「用完即棄」

文章日期:2021年11月24日

【明報專訊】有線寬頻(1097)旗下有線新聞噚日再傳人事變動。有消息稱,被戲稱為「四人幫」嘅有線電視新聞及公共事務副總經理謝燕娜及許方輝、新聞及公共事務總監李臻及陳興昌傳將會離職,東周刊社長關慧玲將空降擔任有線新聞總監。不過其後有傳聞稱,當初由有線大股東「永升」背後財團兼最大股東新世界(0017)甄選加入有線嘅李臻有得留低。雖然傳聞滿天飛,但小琴猶記得舊年8月「四人幫」上任後,臨近年底先大刀闊斧裁員達40人,王牌節目《新聞刺針》更全組遭解僱,引來員工反彈兼要求「四人幫」交代裁員準則,當時被逼宮嘅陳興昌以「爛仔講數」形容員工,事件鬧得沸沸揚揚。

今次傳出「四人幫」即將離職,唔少網民都諷刺「四人幫」不足一年被有線「用完即棄」。不過花生背後,本報曾向有線查詢,公司只表示「對外間傳聞,不作任何回應。新聞部運作一切如常」,最終有線如何變天仍待下回分解。

[小琴密語]