周凱旋:深受人類AI棋戰所感動

文章日期:2021年11月30日

【明報專訊】「超人」李嘉誠旗下維港投資(Horizons Ventures)不時投資對社會具影響力嘅「新玩意」,創辦人周凱旋噚日喺會議分享最深刻嘅一幕,係見證世界第一場AI對戰人類冠軍嘅圍棋賽。佢話自己當時坐喺房入面,聽到世界冠軍李世乭話為咗個囡而戰;即使有機會喺全世界面前輸畀電腦,佢都仍願意為咗下一代而繼續前行,覺得深受感動。

周凱旋又透露,維港投資正研究兩個主題,第一項係將社會元素擺落下次投資,希望可以將「尊重為本」同「人類尊嚴」置入商業模式,改善社會不滿的情况。第二項主題就係「女性如何從內疚感枷鎖中釋放」。不過佢無明確咁分享投資動向,小琴都好期待呢兩個主題可以點樣實踐!

維港投資係合成生物科技嘅先鋒,周凱旋相信喺未來5至10年,市場上嘅選擇將會百花齊放。 至於旗下嘅植物蛋白健唔健康,周凱旋就話唔知要點樣定義「健康」,但作為中國人,傳統覺得少食就係健康。不過佢敢肯定,比起現時飯枱上面嘅嘢食,植物蛋白絕對唔會更無益。

[小琴密語]