小米富途港股民今年最愛

文章日期:2021年12月17日

【明報專訊】Google早排公布今年香港最熱搜財經字詞係「iBond 2021」,小琴身邊嘅「炒鬼」朋友都覺得有啲意外,反問「竟然唔係小米?」今日富途證券就公布,富途嘅香港客戶喺過去一年,平均交易次數達到154次,每月平均交易近13次,當中熱門交易港股首位為小米 (1810),其次為騰訊 (0700);熱門交易美股首兩位依次為富途(美:FUTU)及AMC院線(美:AMC),賽果似乎比較貼近一眾股民嘅心水。

統計由2021年1月1日至2021年12月14日收集數據。事實上,股民無論有冇用小米產品、係咪雷軍粉絲或「mi fan」都好,都不得不承認小米今年喺港股中就好似漆黑中嘅螢火蟲咁鮮明、咁突出,只要去各大網上討論區睇一睇,就見到長期有一大班人討論,股價跌時哀鴻遍野,股價升時就個個叫SH(Strong Hold)Go Go Go。至於富途嘅情况亦都一樣,隨着香港人買美股愈來愈方便,股民尤其係年輕人都熱中買美股,而富途亦都係長踞各大網上討論區顯著位置,就知支持者眾。

[小琴密語]