顏寶鈴炮轟政府 「隔離政策好冇自由」

文章日期:2022年1月13日

【明報專訊】本港接連爆發新冠疫情,入境檢疫措施持續嚴格,包括要求高風險地區入境人士到港之後,需喺指定檢疫酒店強制檢疫21天。身兼港區全國人大代表、飛達帽業(1100)副主席兼董事總經理顏寶鈴噚日就喺記者會連番炮轟政府,話集團喺孟加拉有間成7000名員工嘅廠房,想去巡視吓業務但要長時間隔離真係「好痛苦」。

佢仲話:「一帶一路推我哋出去,但返嚟又要21日隔離,真係好冇自由度!」佢又認為:「隔離對打工啲人有咩所謂,政府嗰啲做唔做都有咁多人工,我哋有成幾千人跟我哋搵食;我哋做生意喺邊度賺錢都係返嚟香港交稅,政府應該對交稅嘅人照顧下,交完稅又冇任何體恤,咁樣隔離真係唔掂!」希望政府考慮豁免營生意人入境隔離政策。

至於今屆第五次人大會議,即將喺3月5日舉辦。顏寶鈴就話,會議目前仍如期進行,並計劃喺3月2日上京。

[小琴密語]