moneymonday
指數/外匯
明報APP

報章內容

券商紛推優惠搶一通客

【明報專訊】適逢有券商倒閉,其他券商紛紛出計招攬對方客戶。日前本地網上券商一通宣布,因應本港疫情持續惡化,決定本月底停止所有網上投資服務。富途噚日就話,推出限時轉倉優惠,無論是新客戶,還是現有客戶喺期內完成轉倉最高可獲現金獎1萬元,或者一部蘋果手機。富途仲講到,公司前線接獲大量轉倉查詢,比平日急增高達20倍,單日收到數千宗嘅轉倉指示需求。

另一券商致富就推出轉倉優惠畀一通客戶,現有一通客戶即日起至3月底,將股票成功轉到致富可享三大優惠,包括港股免佣6個月、按轉倉貨值送高達1000元超市禮券,股票期權長短倉更平至8元張。

耀才證券(1428)就話根據轉入股票價值,送贈不同股數嘅騰訊 (0700) 股票,但用戶需要喺3個月內滿足指定嘅交易要求。富昌證券同樣係送股票,針對轉倉股票金額獲發相應嘅蘋果(美:AAPL)股票,而客戶亦需喺指定期內滿足資產淨值要求。

眼明心細嘅小琴就留意到,無可否認優惠相當吸引,但唔少券商亦表明客戶需要喺指定時間完成轉倉同具有一定資產,先可以拎到個優惠。

email:piano@mingpao.com

[小琴密語]