明報APP
報章內容
調查：八成受訪港人有移民念頭
標籤：小琴密語
【明報專訊】香港過去幾年環境大變，唔少港人選擇移民海外，咁到底係有幾多呢？愛爾蘭投資移民公司Bartra噚日公布一項民意調查，話受訪市民入面高達八成都有移民念頭，當中有超過一半移民原因都係想有更理想嘅生活環境，似乎反映對現狀好不滿喎。
Bartra話，本港移民熱潮喺2019年掀起，目前趨勢依然強勁，去年公司錄得近5400萬歐元（約4.57億港元）投資額 ，相當於約60個家庭申請做投資移民，成為亞洲最大愛爾蘭投資移民計劃（IIP） 項目供應商及服務商。
首3名地點係台灣英國澳洲
Bartra於上月以網上問卷形式，向500名18歲及以上嘅香港市民進行調查，當中約八成有意欲移民，首選頭3名移民地點係台灣、英國同澳洲。另外，除咗有約51%人因為想有更好環境移民外，有29%就想為子女尋求更好的教育，有27%港人希望取得多重外國居留身分和國籍，反映佢哋對教育制度亦唔滿意。