明報APP
報章內容
恒生聯乘「試當真」 中銀搵TVB藝員 港銀爭推優惠 力谷年輕客開戶
標籤：小琴密語
【明報專訊】近年銀行大推各類年輕人理財優惠方案，但從佢地搵嘅代言人，睇得出各自市場定位有所不同。繼匯豐搵姜濤力谷年輕客戶群後，恒生銀行（0011）噚日宣布，聯乘YouTube頻道「試當真」創辦人游學修、許賢同蘇致豪，話要啟動「試下mode」，針對年輕新客戶，為旗下理財產品推出一系列優惠，包括優進理財Preferred Banking開戶享100美元獎賞，額外港元儲蓄存款年利率為2厘。
恒生銀行財富管理及個人銀行業務主管李樺倫就話，年初至今整體私人貸款錄得雙位數增長、趨勢持續，而以年輕人為服務對象嘅優進理財戶口去年嘅開戶人數按年上升超過兩成。
中銀香港（2388）就搵嚟TVB旗下嘅姚焯菲、劉佩玥同張馳豪3位藝員做代言人，推出「理財TrendyToo」年輕品牌，同樣主打年輕人理財市場，新客戶開戶迎新獎賞達5100元；以手機開戶可享6個月港元或美元高息定期存款，年利率1.5厘。
中銀香港個人金融及財富管理部助理總經理（客層管理）溫晞文就話，舊年18至35歲年輕客戶經數碼渠道嘅交易量，按年升四成，以手機開戶人數仲升咗1倍。
email:piano@mingpao.com