moneymonday
指數/外匯
明報APP

報章內容

伴侶規劃旅行 多過規劃財務

【明報專訊】星展銀行噚日公布一項同宏利合作嘅調查,發現香港只有32%嘅伴侶曾經傾過整體嘅財務規劃,反映其餘68%嘅伴侶可能冇傾過。至於相比起財務規劃,調查就發現佢哋更樂於優先擬定旅遊計劃,佔45%咁多。

六成港人人生目標:財務自由

另一項都值得注意嘅調查結果就係,有62%嘅香港父母有計劃畀自己仔女傳承財富,但當中只有四分之一曾經向財務策劃師諮詢點樣建立財富,同埋訂明財富繼承人。仲有呀,調查又發現有63%香港受訪者以「實現財務自由」為主要人生目標。

星展香港保險業務主管勞永耀話,香港市民對長遠財務自由嘅期望同實際財務規劃之間存有落差。而宏利香港及澳門首席伙伴銷售總監梁惠嘉就表示,家庭需要「未雨綢繆」,等到退休或者供仔女讀書嘅時候唔使咁多煩惱。

話說回來,有近七成人冇同伴侶傾過財務規劃,真係好驚人,不過小琴又想問吓大家,平時會唔會同另一半傾吓自己搵幾多錢、收埋幾多私己錢?咁會唔會覺得調查結果好似合理咗?

email:piano@mingpao.com

[小琴密語]