moneymonday
指數/外匯
明報APP

報章內容

華置請暑期工 最低門檻13歲

【明報專訊】暑假將至,唔少大學生都忙住搵實習機會,華人置業(0127)就行「時光倒流」路線,推出暑期工計劃,最細13歲已經有得報名,十足十以前要賺錢養家嘅「童工」。集團話,時薪最高達500蚊,強調毋須工作經驗,唔理年齡、學歷,只要係學生就得!

計劃提供逾百短期同兼職職位,除咗會計、法律、證券、物業銷售等傳統範疇,亦有「P圖達人」、「數錢大師」、「直播主持」等特別職位。工作期係7至8月,每個禮拜至少一日假,如果員工在職期間表現出色,日後集團有相關空缺會獲優先聘用。另外,如果家庭經濟狀况較差,只要通過基本審查,就會獲優先考慮,而且有膳食同交通津貼。

家庭經濟較差者可獲津貼

不過,華置話唔夠15歲嘅話,返工前要交「家長同意書」,未讀滿中三亦要交「在學證明書」,而所有申請者都要交個人履歷同自薦計劃書,內容最突出嗰個會由集團主席「甘比」陳凱韻親自面試𠻹。不過,計我話,幾筍都好,中學生都係好好享受暑假啦,以後有成幾十年工畀你返啊!

email: piano@mingpao.com

[小琴密語]