明報APP
報章內容
縱橫遊挖虛幣 開源變隱憂
【明報專訊】近月各國陸續開關，市場憧憬旅遊市道復蘇之際，縱橫遊（8069）噚日公布截至今年3月底嘅上個財年業績，收入按年增加10.8%至284.1萬元，當中有逾四成收入來自虛幣開採，成為公司第二大收入來源，期內公司更沽出虛幣賺咗1.7萬元𠻹！公司仲話，未來會繼續尋找機會，並尋求喺其他行業嘅業務發展。縱橫遊噚日收報0.46元，升2.22%。
疫情一直衝擊本港旅遊業，唔少旅行社先後拓展新業務開源。縱橫遊舊年7月斥資240萬元進軍虛幣挖礦，的確成功為公司帶嚟收入增長，但其實該分部年內仲蝕緊240萬元；更錄得9.1萬元嘅虛幣減值虧損。近期又爆發「幣災」，比特幣由3月底嘅4.7萬美元水平，直插至噚日最低見過1.98萬美元。唔知縱橫遊會唔會損手呢？