moneymonday
指數/外匯
明報APP

報章內容

匯豐伙社福機構 助精神受困擾客戶

【明報專訊】疫情下經濟差,唔少人都可能因為咁而有財務壓力,甚至衍生精神健康問題,例如睇到月結單嘅時候會覺得焦慮,或者因為擔心冇錢找數,連銀行寄嚟嘅信都唔想開嚟睇。匯豐就同浸信會愛群社會服務處合作,了解呢方面嘅服務需求後,決定推啲新服務,支援精神健康受困擾嘅客戶。

匯豐話,佢哋會為呢啲客戶提供特別編制嘅理財教育資源、費用豁免同埋授權第三方協助監察戶口等等。有需要嘅客戶可以用書面形式授權佢哋信任嘅人,幫手喺匯豐分行查閱戶口結餘同埋交易紀錄,不過客戶仍然係全權管理自己嘅財務,其他人係唔可以用個戶口做任何交易㗎。

為咗方便客戶得到支援,匯豐話申請時係唔需要證明你嘅精神健康狀况。如果你有需要用到呢啲服務,可以搵浸信會愛群社會服務處、香港聖公會福利協會、新生精神康復會、OCD & Anxiety Support Hong Kong或利民會幫手轉介。

[小琴密語]