明報APP
報章內容
驅鬼師遭創板公司入稟追債
【明報專訊】市場上不時有追債新聞，最新嘅奇聞係連驅鬼師都畀人追債。話說GEM板宏強控股（8262）發公告，佢哋因為2019年10月尾貸款畀當年合營工程公司嘅伙伴陳漢榮、袁秀蓮夫婦1500萬元，簽咗6次補充協議，將還款期一再延期，一路延到今年11月30日。
還款期由疫前延至今年
雖然當年陳氏夫婦將手上從事休閒樂園嘅弘泰工程35%股權質押畀宏強，又曾話過會尋求金融機構融資後就可還款，但之後話，撞正疫情致遇阻滯，最終宏強無晒耐性發難，喺11月30號貸款到期告上法庭追債。
雖然陳漢榮、袁秀蓮個名睇落名不見經傳，但係小琴八卦喺網上周圍睇，結果發現陳某原來係國際聯密佛教慈航會創辦人，正正係陳漢榮本尊，並名陳果齊，助人驅鬼。佢個仔亦係玄學界中人陳定幫，搞下運程App同時，每年農曆新年前均上鏡替明星及眾人指點迷津，講講流年運程。小琴對陳上師驅鬼本事無質疑，但呢次都好想知道，佢會唔會驅債成功呢？