明報APP
報章內容
信銀國際開工利市2000 花旗派688好意頭
標籤：小琴密語
【明報專訊】兔年首次與各位見面，小琴祝讀者萬事勝意！噚日係農曆新年長假後第一日返工，各大公司都會按傳統派開工利市，嗰封利市有幾大封每年都係城中熱話。信銀國際今年繼續向員工派2000元利市，暫時見係咁多家零售銀行中最高。
另外，花旗噚日就向全體員工派688元新春利市。總結今年零售銀行披露嘅利市金額，虛擬銀行眾安派1000元，多數銀行金額就介乎100元至500元。為推廣環保，各大銀行都用電子形式派發利市，匯豐同中銀就經自家電子錢包派發。
唔止員工嘅開工利市，銀行今年繼續推出現金獎賞，吸引市民一齊經用電子方式派利市。不過，話分兩頭，投行同私人銀行出嘅利市封，喺二手網站開價幾百元出售，雖然唔知係咪真正有價有市，但反映派出手可以威威嘅實體利市，又好似仍然有佢嘅需求喎。