明報APP
報章內容
大灣區航空推3套來回台北機票1890元
【明報專訊】旅行熱潮浪接浪，大灣區航空噚日就宣布推出1890元買3套「香港飛台北」來回機票優惠，只限同一人使用，必須喺2024年1月30或之前出發。每程包20公斤託運行李，但唔包括稅項及燃油附加費。旅客每次最少喺台灣停留2日，最多留14日；優惠期至5月10日。
大灣區航空仲話，旅客買票時須確定3套來回程機票嘅航班、日期同時間。出票後，第一套來回機票唔可以更改，第二、第三套來回機票各有一次免費更改機會，之後每次更改，每人每套機票要畀多500元。
非指定時間出發加多100元
如果喺8個指定時間內出發，可享激筍價1890元。即使夾唔啱呢8個指定時間，只要喺今個月19日至12月21日，又或12月26日至明年1月30日期間任何日子出發，都只需加多100元，即1980元都得。