明報APP
報章內容
澳博蘇樹輝將退任副主席等職務
【明報專訊】澳博（0880）宣布新一輪人事調動，宣布老臣子之一嘅副主席兼行政總裁蘇樹輝將於6月15日股東大會之後退任，唔再連任，淡出上市公司。日前澳博子公司澳娛綜合喺上載嘅全年業績報告，已經顯示佢唔再擔任股東大會主席團嘅主席，只任董事，似早有暗示。早年跟開已故賭王何鴻燊嘅元老級人馬，正式全部淡出上市公司嘅董事會，又係另一個時代嘅開始了。
講起蘇樹輝，可以話係少數喺博彩行業中工作屹立多年、同埋見證過去47年行業起伏嘅博企高層。1976年佢就喺澳博嘅母公司澳娛工作，經歷獨家經營博彩嘅時代同兩次續牌，繼而由澳博接手賭牌，再至今見證澳博續牌，相信無幾多人會有佢咁嘅閱歷。佢本身亦係持股2.19%嘅澳博小股東，以噚日價值計，最少值6.17億元，名正言順係超級打工仔。佢老人家對傳媒向來友善，亦教識唔少跟濠賭股嘅行家，去認識呢個向來畀人有神秘感覺嘅澳門博彩行業。佢閒時亦喜歡舞文弄墨，書法更係佢嘅看家本領，上葡京內展示嘅「謙卦」正係佢嘅鎮店墨寶，大家有機會可以去參觀吓。