明報APP
報章內容
「歌神」演唱會反應熱烈 震動星洲股市
標籤：小琴密語
【明報專訊】「歌神」張學友唱功了得，佢歌聲嘅震撼性，已經震動到新加坡股市。新加坡專搞大型活動嘅凱利板（相當於香港創業板）上市公司Unusual Ltd（飛凡有限公司）股價最近連升5日，當中尤以周二股價大升13.6%，搞到新交所入信查詢，公司要發公告澄清。佢哋話，股價同成交有咁嘅反應，應同正開售7月中起舉行嘅張學友60+巡迴演唱會新加坡站門票，反應熱烈有關喎，咪話唔誇張。
「歌神」演唱會門票反應，罕見成為上市公司用嚟解釋股價異動嘅理由，既震動歌壇，仲引起國際外電彭博報道跟進。過往「歌神」不時震服各地迷哥迷姐，記得佢2017年喺澳門搞嘅幾場演唱會就一票難求，墟冚情况直逼韓團表演，當年聽講搞到交通擠塞咁話。Unusual Ltd喺香港名不經傳，但佢哋所屬嘅控股公司mm2全亞影視娛樂喺香港子公司出品嘅電影，大家或者睇過，當中比較出名嘅包括《一秒拳王》及近期上演的《窄路微塵》。