明報APP
報章內容
宏利調查：57%港人料退休後繼續做
【明報專訊】你以為退咗休就唔使「DO」？宏利投資管理研究就話「NO」。宏利做咗個調查，發現有57%嘅香港人覺得自己無足夠儲備應付退休生活，預咗退咗休都要繼續做；其中，年輕一代（Z 世代，即 21 歲至千禧世代嘅28歲）已經開始提早準備退休儲備，反而年長一代（X世代，即39歲至嬰兒潮嘅44歲）就遲啲準備。
根據2021年人口普查，香港有一半65歲及以上嘅人仲同子女一齊住。但係出生率下跌、同家庭規模縮小，威脅家庭照顧嘅基礎；加上住屋成本、日常開支係咁升，都令老人家財務狀况更嚴峻，又同時削弱年輕一輩照顧年長父母嘅財務能力。
新世代唔單止要供養退休父母，仲要負擔埋佢哋退休後嘅整體家庭支出，呢樣就解釋到點解有約四分之一人希望「退而不休」，繼續為家庭提供經濟援助。
研究仲講，大部分生兒育女嘅女性需要暫停工作，甚至有機會無限期停止工作。佢哋喺生BB後嘅收入，亦往往比生之前少，導致收入少咗、同退休金儲蓄嘅速度減慢。由於女性預期壽命更長，佢哋首要財務目標就係財富增值、退休同個人消費。