明報APP
報章內容
南航「四饅」飛機餐引網民熱議
標籤：小琴密語
【明報專訊】除非坐頭等或商務艙，否則小琴對於飛機餐本身都唔會有太高期望，何况小琴根本與頭等、商務艙無緣，即係話對飛機餐係從來無期望。不過無期望之餘，有時啲飛機餐都會畀到好多「驚喜」你。
話說內地網紅「峰哥亡命天涯」喺微博發帖文，話搭南航（1055）某航班時、一打開個飛機餐真係要「四萬咁口」，唔係話笑到四萬咁口，係真係得「四饅」：4個饅頭，呀，講漏咗，其實仲有1片菜，外加一小包榨菜。佢喺帖文寫道：「這麼多年頭一次看到這麼奇葩的航空餐。」相關帖文引發網民熱議，有網民認為「過於寒酸」。
加菜防微波爐加熱令饅頭烤糊
南航客服回應，話唔同航線嘅配餐唔一樣，呢種餐食屬於某些航線上的「中式點心」，至於嗰片菜，係微波爐加熱時蓋喺饅頭上，防止被烤糊。
不過小琴睇個片菜嘅大細，似乎難以同時兼顧嗰4個饅頭，究竟最後佢選擇保護了誰？