明報APP
報章內容
金管局出紙鎮「唔足秤」可退貨
標籤：小琴密語
【明報專訊】今時今日其實有幾多人會用紙鎮呢？應該有嘅，至少金管局相信有，所以就刻意用啲已廢棄嘅現鈔有咁碎整咁碎，然後放入個硬膠透明盒內做成紙鎮。咁紙鎮最重要係乜？要夠重嘛，金管局驚個紙鎮「壓唔住場」，於是為紙鎮引入「基石投資者」坐鎮，即係放石頭入去增加重量，點知出事啦！
金管局噚日話，近日「獲悉」因為加咗石頭，紙鎮入面嘅碎鈔數量未到達紙鎮標籤上標示嘅約數，如果買咗嘅市民希望退貨，可致電金管局資訊中心熱線28781111或電郵至info_centre@hkma.gov.hk安排退款，嗱，大家記得唔好搞錯打咗去海關喎，金管局仲話對任何不便表示歉意。好，百萬元問題來了！究竟誰人發現紙鎮內碎鈔數未達標？邊位神人做了統計再話畀金管局聽？小琴就唔知了。
email: financepage@mingpao.com