證監會捉內幕交易「大小通殺」

【明報專訊】證監會捉內幕交易，除咗捉大老虎之外，最近連烏蠅都照打，實行「大小通殺」！最新一宗個案，話說喺追溯番2020年建滔集團（0148）要提出私有化旗下線路板公司伊利安達嗰陣時，當時嘅主席兼執行董事私人助理黃百偉因為開會時聽到呢單堅料後，隔咗幾日用私家戶口用10.98元入咗3000股伊利安達。之後伊利安達停牌後再復牌，股價炒高近六成三。雖然黃某揸多3日先至沽貨，但都賺咗19,080元。當然咁近管理層又收到堅料炒股，想唔畀證監捉都難，法院仲話其實可判監咁話。之不過法官見黃某認罪，又賺得唔多，判黃某社會服務令240小時，又罰佢2.5萬元，同畀番超過3.8萬元調查費。調查費雖然加埋都係約略一個半至兩個全職洗碗工每月薪水咁上下，表面好似無乜嘢，但一句唔該查你3年，都咪話唔頭痕！