明報APP
報章內容
三代金管局總裁30年後再同框
【明報專訊】金融峰會係慶祝金管局成立30周年嘅重頭活動，三代金管局總裁噚日歷史性同框，分享當年難忘時光。好多人都知金管局總裁辦公室喺國金二期88樓，初代總裁任志剛話當初以為嗰度睇煙花應該幾過癮，不過原來嗰度喺正煙花上面，只望到一堆煙。佢又話有次試過打10號風球返辦公室，貼近個窗感受一下個風係幾咁強勁。
任志剛講起金管局起源，係因為1983年貨幣危機，同年出現銀行危機，前後拯救7家銀行，加埋1987年發生股災同回歸在即，佢覺得唔可以只做救火員，需要有一個機構可以做埋防火工作，於是喺1988年行出第一步，將貨幣控制權由商業銀行匯豐收回政府。至1993年成立金管局，因為回歸前後涉及貨幣同金融制度嘅變動，要說服英國、中國內地和香港殖民地政府，過程既漫長又痛苦。
第二任總裁陳德霖諗起1998年8月，金管局入市打大鱷，因為行動好有爭議，所以要保持高度機密，只能涉及少數核心人物，承受唔小壓力。當時係任志剛助理嘅現任總裁余偉文就話，當任志剛同佢講明日入市買股票時，都忍唔住爆咗句「你傻咗呀？」