明報APP
報章內容
結好證券傳經紀生意唔達標 將勸退
標籤：小琴密語
【明報專訊】港股交投淡靜，新股市場萎縮，證券經紀行業都生意難撈。噚日市場內廣為流傳結好證券一份內部通知，話因網絡證券流行、零佣金大流行，佣金收入斷崖式下跌。就算近期港股回暖，對傳統經紀幫助唔大。同時，行業又面對監管成本增加，搞到收支好難平衡，無奈要諗計縮皮。
嗰份通知話，如果客仔生意超低而純自炒嘅經紀，3個月過渡期，即喺下年3月底前若牌照到期就唔會再續。由下年4月起如無法達標嘅經紀，就會被勸退。如佢哋轉會、退休或轉行，公司可以幫手。小琴見到都嘗試搵結好求證，但暫時未搵到人。講開又講，其實結好金融（1469）旗下經紀業務喺9月底公布中期業績，稅前分部盈利仲超過4000萬元，但原來靠定存利息收入頂住，先至扭虧。佢哋畀經紀佣金，其實比上年少咗兩成。通常畀佣愈多，生意就愈好，換言之，生意幾好大家自己知。
email: financepage@mingpao.com