明報APP
報章內容
「龍茅」炒價回落至4700元人幣
標籤：小琴密語
【明報專訊】仲有一個月就到農曆新年，大家辦好年貨未呢？貴州茅台（滬：600519）最近推出「龍茅」甲辰龍年貴州茅台酒（見圖），市場原先估會炒到「龍咁威」，不過炒風似乎好快冷卻。內媒引述多個經銷商證實，噚日「龍茅」單支價格約係4700元（人民幣，下同），比起之前炒到7500元大跌，不過有啲電商平台都仲賣緊6000元左右，但比起炒價都有所回落。
2015年「羊茅」 每支3萬最值錢
其實茅台自2014年開始推出生肖限定版，至今已經推出咗11款，每年啱啱推出市場都會被熱炒，但最終大部分都係「高開低走」，當中以羊年最貴，原箱每支盛惠3萬元，而馬年原箱每支都賣緊1.75萬元。
睇番上一個羊年係2015年，當年過年時A股熱火朝天，上證指數一度升至5100點，跟住就係大冧市。
今次「龍茅」就係1月6日正式喺「i茅台」APP推出，今次活動一共有9999支龍茅面世，數量比起2023年29999支「兔茅」大幅減少。有茅台經銷商預期，龍茅最終價格大約係3000元，同兔茅差唔多。