明報APP
報章內容
山姆掃貨 小心中伏
標籤：小琴密語
【明報專訊】香港通關帶來嘅好處，其中一樣係北上消費蔚然成風。近期每個周末港人攜老扶幼到深圳山姆「血拼」已成日常，不過隨着呢股山姆購物潮掀起一段時間後，近日陸續浮現個別「中伏」個案，甚至喺社交媒體都出現「山姆中伏分享Group」，分享唔少買到嘅中伏商品（見圖）。
有網民分享佢喺山姆買咗部「相當冷靜」嘅室內加熱器，開咗兩個鐘先送你一陣微微的暖意，「體感根本達唔到取暖嘅效果，超伏！」最慘係已拆包裝，唔可以退貨；有網民話買咗啲護墊，點知一開見到護墊內層「寧左勿右」，側埋一面；又有網民買咗個氣炸鍋，返香港用時先發現部機無反應，最後試下自己改個13A三腳插都唔得，真係當場「氣炸」。
小琴覺得北上消費固然係平，但大出血掃貨會唔會中伏，就要看閣下嘅造化。掃得興起之餘，要預咗一旦中伏，都會咁傷。
email: financepage@mingpao.com