明報APP
報章內容
阮國恒同「光B」jam歌 提醒大家唔好亂撳Link
【明報專訊】金管局為咗提醒大眾唔好中伏撳錯Link畀人騙可以去到幾盡？金管局同「光B」尹光合作已經唔係新聞，不過最新推出嘅防騙單曲《Link咪亂撳》MV連副總裁阮國恒（Arthur Yuen）亦有粉墨登場，變身做「光A」同「光B」齊齊jam歌，身體力行宣揚「假Link咪當真 唔好俾人昆」。
簡單直接歌詞 「洗腦式」警惕
Arthur作為一個被金融事業耽誤嘅歌手出場時間並唔多，主要都係提醒大家唔好亂撳Link；今次MV更多係由光B出馬，簡單介紹釣魚詐騙手法常用場境，例如假扮銀行發出短訊，要求市民透過超連結提供帳戶資料；推廣優惠吸引市民到虛假商戶網站購物；誘騙市民下載虛假手機應用程式等，以優惠騙取市民的信用卡和個人資料。
光B今次MV入面造型百變，化身成髮型師助手、精明太太等多個角色，唱「醒」幾個差啲誤墮釣魚連結陷阱嘅市民，仲用熟悉旋律和簡單直接歌詞，「洗腦式」警惕市民一定唔好大意、輕率點擊超連結。小琴都提提大家，農曆新年期間一定有唔少節日推廣，真係要睇清睇楚先好撳入去，唔好大意，在此祝大家百「伏」不侵！