明報APP
報章內容
奇點國峰：罷免非執董因唔睇email
【明報專訊】相信好少打工仔會鍾意睇公司email，有公司嘅非執行董事據指因為唔睇email、文件被人炒咗；被炒嘅條氣當然唔順，就話被炒實際原因係唔同意公司發新股。
噚日奇點國峰（1280）公布，公司上月底罷免嘅非執董徐紅紅出嚟反駁，話被炒原因係唔同意認購事項、即係指1月中奇峰配售4386萬股新股畀劉楊，集資淨得2996萬元呢單交易。不過，公司董事會重申，徐紅紅所宣稱嘅事「毫無根據且未經證實。」
公告強調，董事會炒佢係因為佢擔任非執董期間，成日開會前唔睇文件、唔睇email，搞到董事會工作同流程有不必要嘅延誤，又唔知佢哋討論緊啲咩。公司仲話，討論認購事項嘅董事會會議亦唔例外，一開始已經將有關認購事項提案通知同相關文件send咗email畀佢，但佢都話唔知呢件事。
小琴睇返資料，徐紅紅係2019年獲委任為非執董，2022年股東會奇點重選董事時獲100%得票通過佢續任。佢本身喺天津渤海擔任法律事務及監管部，同埋擔任投資及資產管理部總監，而天津渤海喺1月配售新股前，揸住奇點約5.9%持股，配售後被攤薄至4.98%。睇黎徐點解被炒，又係一件「羅生門」事件。