明報APP
報章內容
海底撈年輕店員組男團 大跳「科目四」
【明報專訊】內地連鎖火鍋店海底撈（6862）出名多搞作，上年推出「科目三」舞蹈服務爆紅。正值新春期間，海底撈更推出新舞「科目四」，並拍攝成MV，喺官方微博同小紅書發布，惹來內地網民熱議。
個MV叫《拜年舞》，已經有超過39萬人觀看，而片長1分22秒，片中搵咗5個來自唔同省市分店嘅年輕男職員化身成男團，齊跳新舞「科目四」，同埋配有唔同布景及打燈，製作非常認真專業。不過，佢哋可能無跳開舞，感覺就跳得唔夠齊。
有內地網民驚訝海底撈製作MV水準媲美內地娛樂圈：「海底撈要改進軍演藝圈了嗎？」另有網民非常受落，「不愧是我最愛的海底撈，希望海底撈還能提供帥哥陪吃服務（我瞎說的）」、「他們五個人會巡迴嗎，哈哈哈。」不過有網民唔多鍾意，「好好好，這個世界終於癲成了我想不到的樣子。」