明報APP
報章內容
美斯代言股極兔速遞 曾挫26% 股民陪「坐」艇
【明報專訊】自從球王美斯來港「齋坐」之後，同佢有合作嘅公司同贊助商成為香港內地網民關注對象。由美斯代言、上市唔夠半年嘅極兔速遞 （1519）噚日股價突然急挫近26%，低見10.2元，見上市後新低。之後收復部分失地，收市報12.04元，跌12.5%，成交金額為8811.9萬元，唔知該股係咪都係逃離唔到美斯嘅「魔咒」，仲要拉埋股民一齊「坐」添。
極兔快遞喺今個月10號一度登上微博熱搜，原因係抖音有暱稱「極兔速遞」嘅帳號，針對網友要求換掉代言人美斯嘅留言，回應話「極兔不缺資源」。公司抖音官方帳號「兔兔快遞員」就快速澄清，話嗰個「極兔速遞」帳號唔係企業帳號，唔代表公司立場，強調「公司會繼續努力，致力於為客戶提供更好的服務。」據內媒指出，嗰個「極兔速遞」帳戶IP位址喺江蘇，為個人帳號，目前已修改使用者名稱，而極兔對冒充官號者同造謠者已報警處理。極兔速遞喺2022年11月搵美斯做全球品牌大使（圖），嗰時賺足關注度，但而家真係「成也美斯，敗也美斯」。
email: financepage@mingpao.com