明報APP
報章內容
國泰搵奧運泳手何詩蓓任代言人
【明報專訊】國泰（0293）噚日公布話搵咗香港游泳奧運選手何詩蓓，作為公司品牌代言人，拍咗最新一輯品牌廣告。行政總裁林紹波話，好榮幸邀請到何詩蓓擔任公司品牌代言人，一齊擁抱「Every Move Counts」嘅共同信念，喺各自領域發光發亮。
個國泰廣告以何詩蓓嘅日常練習片段為主軸，記錄佢細細個到大個訓練過程，以對應國泰嘅服務信念。何喺《國泰的故事》訪談提到，話喺海外完成訓練或比賽，返嚟坐國泰機，聽到機艙服務員以熟悉嘅語言廣播，都感到溫暖窩心喎。
搭飛機睇卡通片減壓
佢仲透露，搭飛機返訓練營同比賽時，減壓方法就係睇卡通片，「我最鍾意係《汽車總動員》同《功夫熊貓》，呢類影片令我投入比賽精神」。另外，原來何詩蓓細個唔鍾意游水，到18歲先愛上；現時佢每星期會到泳池訓練10次，去健身室兩次，仲參加室內動感單車同瑜伽課程。