明報APP
報章內容
David Webb招義務編輯「永續」個人網站
【明報專訊】獨立股評人David Webb自4年前宣布患上前列腺癌減產後，周日（19日）公布新計劃希望「永續」個人網站「Webb-site」，暫時計劃以類似「維基百科」嘅形式運作，任何人都可以登記成為義務編輯及更新上市公司資料，首要任務係更新上市公司董事薪酬。
David Webb解釋，近日網站新增上市公司董事會薪酬功能，不過資料無法自動化歸檔，所以希望群策群力，完成後大家都有更多上市公司薪酬資料可做參考。用戶登記成為編輯之後，可根據指示填寫資料，再經其他義務編輯審核後發布。有任務當然有獎勵，David Webb話如果身體狀况許可，提交量最高嘅首兩名義務編輯，可以年底同佢喺香港會食個靚午餐。
小琴上周五有幸見到David Webb真人，佢都相當精神，喺度祝佢加油兼身體健康。噚日晏晝見到，最高提交量嘅兩名編輯加埋都提交超過500份薪酬資料，有興趣嘅朋友記得幫幫手。