明報APP
報章內容
「渣哥」食肆將全面結業
標籤：小琴密語
【明報專訊】毛記葵涌（1716）有份持股，由前港姐冠軍譚小環同丈夫蔡強榮創辦嘅「渣哥」食肆，昨日（29號）晏晝喺社交平台宣布將會全面結業，但未有透露結業嘅原因。帖文話，位於九龍灣嘅「大渣哥茶記」最後營業日係6月12日；德福嘅「渣哥一九九六」分店就7月8日最後一日營業，又話「時光飛逝，轉眼十年！相知相遇，感恩沿途有你！縱然萬般不捨，終須一別！」，仲話「香港人！珍重、再會」。
渣哥2月喺社交平台承認餐廳門口有張貼欠租封舖告示，又話「生意差咗都年幾兩年，尤其係通關之後，不過唔想影響到班員工同埋供應商，所以一路都默默撐得幾耐得幾耐。」蔡強榮夫婦2014年喺銅鑼灣開設小食店，主要賣魚蛋等港式小食，後來分別喺尖沙嘴、鰂魚涌同旺角等地開店、又拓展茶餐廳業務，喺九龍灣同埋灣仔開大渣哥茶記。其間，毛記葵涌喺2018年至2020年間，合共花咗544萬元入股49%股權、揸到𠵱家。