明報APP
報章內容
山姆推直送港服務 首公斤運費30元
【明報專訊】內地大型超市山姆吸引唔少港人北上掃貨，最新推出直郵香港服務，方便一眾港人唔使北上都可以「買買買」。根據官方介紹，香港跨境直郵服務主要有五大重點，分別係官方直郵、次日送達、支持送貨上門或自提、本地支付方式，以及專屬粵語客服。
設專屬粵語客服 可送至離島
要喺香港購買山姆產品，就要用到山姆嘅應用程式，截單時間係每日下午1點，1點前下單貨件可以喺第二日送到，離島部分地區就要隔日先送到。除咗內地禁止出口及香港禁止進口商品外，其他任何商品都可以配送，不過生鮮食品就唔屬配送範圍，山姆App內標示貨品可否送達香港。
山姆直郵香港每張訂單最高金額為5000港元，系統支援多種港人北上經常使用支付方式，分別係Alipay HK、支付寶、微信支付等，但信用卡、PayMe、八達通就未見有得用。山姆香港直郵服務冇設最低消費額，但以送貨上門為例，首1公斤運費就要30元，其後每公斤收費4元，唔知大家又有冇興趣試用呢？