明報APP
報章內容
Lalamove：港人避鬼節搬屋 多揀吉日
標籤：小琴密語
【明報專訊】香港人表面好潮，但其實都好尊重傳統，每逢人生大事都要揀個好日，包括搬屋。Lalamove統計今年6至9月訂單數目，發現過去27個適宜搬遷嘅吉日當中，有18日收到以5.5噸貨車或9噸貨車用嚟搬屋嘅訂單，都高於同月嘅日均平均值，更佔超過整體吉日訂單數量嘅65%。
Lalamove統計又發現，除咗吉日訂單明顯較多，吉日前兩至三日嘅訂單都比較多，特別係油尖旺區訂單，相信係因為裝修師傅趕住喺吉日前「交樓」，call車運送材料，推高用車需求。
除咗「趨吉」亦會「避凶」，農曆七月即使有適宜搬遷吉日，訂單數量都唔見增加，「鬼節」盂蘭節當日同埋之後嗰幾日，訂單數更加跌得特別急，真係「鬼影都唔見多隻」；反而係農曆七月前最後兩個搬屋吉日嘅訂單，更係統計期內最高，反映唔少港人務求安心都會趕喺農曆七月前搬屋。小琴就話梗係啦，搬搬下屋多咗舊嘢就唔好啦。
email: financepage@mingpao.com