明報APP
報章內容
劉鳴煒Ig翻譯「我唔過海」成阿拉伯語
【明報專訊】話說行政長官李家超噚日公布新一份《施政報告》，包括開拓中東及東盟旅客客源，鼓勵的士車隊用阿拉伯語提供車隊服務資訊，即刻引起咗社會巨大迴響。本港富商大劉嘅大仔、曾經係海洋公園主席嘅華置（0127）非執董兼主席劉鳴煒，噚日亦都喺Ig post story，轉發咗有關新聞話「呢個就係我每星期用7個鐘學阿拉伯語嘅原因」，之後亦再出多個story將「我唔過海」翻譯成阿拉伯語，唔知佢係咪方便將來的士大佬們「婉拒客戶」時用？
除咗劉鳴煒之外，其實網民亦將「冚咗旗啦」、「交更，唔好意思」同埋「我無兜路，呢條路快啲」，製作成「迷因」（meme）圖喺網上分享，不過小琴就搵唔到「冇錢找」嘅meme圖，唔知每星期學阿拉伯語7個鐘嘅劉鳴煒，識唔識「冇錢找」嘅阿拉伯語呢？