鄭志剛再獲委財富傳承學院主席

【明報專訊】近期新世界發展（0017）財務問題搞到投資界心慌慌，不過被指搞出「大頭佛」、但已撤出公司管理嘅非執行副主席鄭志剛繼續全情投入公職。皆因噚日金發局公布，再次委任鄭志剛做香港財富傳承學院董事會主席，任期由今年1月17日開始，為期兩年。

查實，鄭志剛近年參與超多公職，既落力推動香港家族辦公室業務發展，又忙於搞文化、藝術的盛事經濟，好多大SHOW都係佢有份牽頭，有時小琴睇到佢咁忙都擔心佢分身乏術。

宜家佢唔再管理新世界發展，金發局再任命他做兩年主席，相信鄭志剛可更專心投入呢項公職，以往佢曾經提出以自身背景，搞好香港藝術生態圈吸引全球家族辦公室關注，大家不妨拭目以待睇下鄭志剛點樣推動香港成為家辦的首選地。

而且其他7位現任董事會成員，包括金發局行政總裁區景麟、科大亞洲家族企業與家族辦公室研究中心資深顧問兼創始主任金樂琦、瑞銀財富管理公會亞太區聯席主席盧彩雲及信置（0083）黃永光等全部都續任，相信合作多時的各位應默契十足，可帶領本港家辦發展更上層樓。

[小琴密語]