【明報專訊】相信唔少人都希望可以預知賽果一夜暴富，之前可能求神拜佛，現時變咗問AI（人工智能）必中號碼。香港賽馬會資訊科技事務執行總監杜禮賢（Gary Delooze）噚日出席一場活動時就話，馬會而家利用生成式AI，根據「馬迷」興趣來幫佢哋揀一匹好馬。
杜禮賢指出，馬會希望可以吸引Gen Z（1997年至2012年出生嘅人）嘅人，但對於從未體驗過賭馬，一開始會覺得好複雜，因為要先了解影響賽果嘅各種因素，「所以我哋喺度諗，點樣變得更簡單？點用生成式AI去幫佢哋更快知道邊匹馬會係佢哋有興趣？」
所以，馬會就推出AI數碼賽馬嘅設備，「馬迷」可以喺屏幕輸入自己興趣，例如「我對某匹馬或某位騎師感興趣」、「呢場比賽嘅距離同天氣條件點樣」。AI會綜合所有數據，話畀「馬迷」聽：「根據你嘅興趣，你可能會想關注呢批馬。」
雖然大家最關心AI可以講邊隻馬會贏，但杜禮賢就話：「目前，我哋仲未做到呢點，但可以提供建議啊！」
