即時財經新聞
【山寨店疑雲】係咪抄無印？名創優品創辦人：我哋係日本品牌！
生活雜貨店MINISO（名創優品）近兩年突然喺香港極速擴張，因為貨品同無印良品MUJI相似、紅底白字嘅Logo又酷似UNIQLO，加上分店喺內地率先冒起，唔少傳媒都懷疑MINISO係山寨店！今日公司其中一位創辦人兼首席設計師三宅順也喺傳媒午宴上解畫，話MINISO係2013年日本成立嘅品牌，有自己設計嘅產品，絕非山寨店。
話就話係日本品牌，但MINISO至今喺日本只有4間分店，會唔會少咗啲呢？三宅順也話，3年前透過共同朋友，同另一創辦人、中國年輕企業家葉國富認識，大家都好想開拓低價優質嘅生活雜貨，所以一拍即合。作為日本人，當年自己好想喺日本開第一間分店，但東京同香港一樣，搵間靚舖相當難，加上日本又係成熟市場，發展新品牌有一定難度，所以就選擇中國為首個開店大本營。
你以為MINISO淨係得中港台等地區有？其實短短4年，名創優品足足喺約46個國家開咗超過2000間分店，遠至約旦、黎巴嫩、埃及都有佢嘅蹤影，不過中國地區已經佔近1000間分店，又難怪市場以為佢喺內地品牌嘅。
今日公司宣布，會同挪威設計團隊Permafrost合作，喺月內發布新產品，團隊設計師Tore Vinje Brustad話，嚿年MINISO主動接觸團隊，仲帶佢地去香港、新加坡同廣州睇舖，見大家理念相似，就嘗試合作。嚟緊MINISO會開到去挪威同德國，公司網頁話，而家每月以80至100間開店步伐擴張，資金來源真係耐人尋味。
MINISO香港而家有50間分店。香港、澳門及台灣區域總經理衛肇泉話，今年會繼續以雙位數店舖數目擴張，上年經濟差，公司一樣可以一日開三間，每間分店每月銷售額都有正增長，部分同店銷售增幅達雙位數字，人均消費44蚊，貴至169蚊嘅「尿袋」（手機充電器）銷售一樣理想。
記者：邱曉欣
●Like「明報財經 mpfinance」fb專頁！