明報APP
即時財經新聞
財經花生｜成龍周六晚於快手直播 出道60年來「處男秀」
香港藝人「北上」吸金都唔係咩新鮮事，不過近年就愈來愈多藝人加入直播帶貨行列。內地短視頻平台快手（1024）近日就宣布，嚟近嘅星期六（25日）夜晚8點，成龍會係快手進行人生第一次嘅全球直播，仲話係佢出道60年以來嘅「處男秀」。
數據顯示，成龍係舊年10月開通快手賬號嘅8個鐘，粉絲人數已經突破1000萬；係10個鐘內，第一條視頻播放量破2億。至今，成龍賬號嘅粉絲已突破5400萬。
事實上，近年唔少香港老牌藝人都嘗試直播帶貨，不過普遍風評都麻麻哋。例如歌手容祖兒（Joey）、蔡卓妍（阿Sa）同鍾欣潼（阿嬌）三人合體直播介紹護膚品，就畀網民懷疑睇緊「貓紙」，介紹產品個陣又唔係好熟，叫佢哋「多做點功課啦」。唔知今次成龍大哥表現會係點呢？