財經花生丨前港姐龐卓欣遇網上騙案失7萬元無懼負評公開事件盼警惕大眾

標籤：港姐龐卓欣龐寶林麥明詩兼職短訊電話實名制詐騙電話丘應樺編輯推介

prev next

網上騙案愈來愈猖獗，連「美貌與智慧」並重嘅前港姐亞軍龐卓欣（Ada Pong）都中伏，三日就損失咗七萬蚊！

講起Ada，相信大家都記得Ada出身自富貴之家，爸爸係基金經理兼股評人龐寶林；佢當年同拔萃中小學同學、「10A」港姐麥明詩同時參選，齊齊成為當屆熱門。

不過，近年Ada已轉型做Youtuber同音樂老師，前日更係其頻道自爆，因為一直想增加被動收入或經網上遠程工作賺錢，近期就收到一個Whatsapp兼職短訊，轉介一個疑似在冒充聯盟行銷平台「clickbank」上工作的機會，話每日輕輕鬆鬆為45個產品reviews就可以賺到錢，結果被騙足足七萬蚊。

Ada受騙嘅經過其實好簡單，騙子一開始指導Ada做tasks，頭幾次佢都好成功收到佣金同回收到騙子要求提供的按金後，仲離奇地因「新手上路」「好彩」中咗幾次獎，令佣金可以翻幾倍。由於Ada所負責reviews嘅產品金額愈來愈大，佣金愈來愈高，係錢愈滾愈大嘅情況下，Ada慢慢上釣。

騙子要求Ada交出嘅按金愈來愈高。直到Ada不斷中獎，開始覺得唔妥時，佢即刻直接打畀銀行都截唔到數，因為「轉數快，啲錢過得好快」…錢已經入咗騙子口袋，拎唔返。

其實喺片段中可以睇得出，Ada並非無防人之心。佢不單多次講出騙子行騙時的漏洞，好似介紹工畀佢嘅人，自稱來自Page Personnel，但佢只係八年前係Page Personnel搵過工，對方突然八年後先搵返佢介紹工，已經非常可疑﹔而佢發現之後騙子提供嘅「clickbank」網站同一般嘅唔一樣，騙子話係員工版網站，佢都半信半疑﹔騙子一開始話中獎只有三次機會，但Ada卻離奇多次中獎等。

但騙子真係好識掌握受害人心理，好似Ada咁因為一心想賺多啲錢，自然容易上釣，即使明知有可能受騙，亦因為一開始金額不大，而且屢試不爽，多次成功收錢，就抱住以小博大嘅心態，慢慢開始跌入騙子嘅心理陷阱。

其實Ada今次公開事件都非常勇敢，事關好多公眾人物都會怕事或怕批評，特別好似Ada有個富爸爸，又係名校出身，仲選過港姐，一定惹來唔少負面留言。不過，Ada就唔諗住因為小小錢就算，而係決定報警同公開事件，等大家小心啲，唔想騙子就逍遙法外。

事實上，電話實行實名制後，身邊朋友大部份異口同聲表示，幾乎日日收十個八個詐騙電話，雖然商務及經濟發展局長丘應樺之前話，推行實名制唔係為了阻止騙案發生，而是幫助警方偵破騙案，但作為市民，特別長者或一些較少接觸新聞的人，可能都會百密一疏，希望警方同政府可以更大力打擊呢啲電話同網上騙案！